Posted on

Uztailean Lakarin haur-tailerrak

Udan sartzera goazen honetan, haur asko oporretan izango dira. Lakarin, halere, egongo da zer egina, 8-10 urte bitarteko haurrentzat elikadura, ekoizpen eta kontsumo jasangarriaren inguruan, 3 orduko iraupena izango duten 4 tailer antolatu baititugu, uztaileko 4 asteartetan, hain justu. Hasiera, beraz, uztailaren 5ean emango diogu Martxel Aizpurua erle-adituarekin. Bertan, erleak, polinizazioa, erle-produktuak eta horien aplikazioa sukaldean arloak landuko dira, besteak beste. Bigarren saioan, uztailaren 12an, berriz, Miren Prieto lakaritarrarekin baratze txiki baten sorrera ardatz hartuta tailer praktikoa egongo da; haziak ereiten, landareak zaintzen ikasi eta jolas didaktikoen bitartez landare aromatikoen mundua ezagutzeko aukera izango da. Uztailaren 19an Larreta Esnekiak-eko Leire Lizeaga izango dugu gurekin, eta esnekien mundura gerturatzeko aukera bikaina eskainiko digu era praktiko eta dibertigarrian. Bukatzeko, Leire Epelde lakaritarrarekin otordu osasuntsuen prestaketarako sukaldaritza-tailerra izango da, uztailaren 26an.

Adin-tartea zehaztu dugun arren, gazteago edo zaharragoak diren haurrek interesa balute, ez izan zalantzarik eta eman izena.

Haurrak baserritarren ekoizpenarekin, elikadura eta sukaldaritza osasuntsuarekin eta ingurumen jasangarriarekin harremanetan jartzeko aukera ederra delakoan gaudenez, animatuuu!

 

 

Posted on

Posible al da ekonomia-eredu iraunkorra?

Bihar, ekainak 16, osteguna, mahai-inguru interesgarria antolatu dugu Lakariko #LakariLab txokoan (goiko solairuan) 19:00etan.

Gaur egun bizi dugun krisi sistemikoaren gako batzuk ulertu eta horren aurrean, antolatzeko eredu sozial eta ekonomikoa berria, Ekonomia Sozial Eraldatzailea, zer den azalduko da. Alternatiba sozioekonomiko horrek, jendartearen ongizatea eta bizitzaren iraunkortasuna helburu izango dituen garapen-eredu egonkor eta parekidea ahalbidetzea du helburu, eta, hortaz, tokiko garapen jasangarrian eragin zuzena du.

Egungo egoera ekonomikoaren gorabeherak azaltzen Ibai Gesalaga zarauztarra izango dugu, eta ESEren nondik norakoak argitzen, berriz, Olatukoop sareko eta Talaios kooperatibako kide diren Gorka Julio eta Beñat Irasuegi.

Lakaritarrok Olatukoop sareko kide ere bagarenez, deialdi berezia egin nahi dizuegu errealitate sozioekonomiko berrien eraikitze-prozesuan zabiltzaten edo interesa duzuen guztioi bertaratzeko. Animatu!!!

Posted on

Lakari, baietz esatea da eraldaketari!

Dagoeneko 2 urte inguru igaro dira, Zarauzko Azken Portu auzoan, gure kooperatibari Lakari izena jartzea erabaki genuen maiatzeko egun hartatik. Eta a zer nolako abentura orain arteko ibilbidea; nork esango zigun guri, gure etxeetako bulego inprobisatuetan, amesten genuen proiektua honaino iritsiko zenik. Izan ere,  makina bat komentario entzun behar izan genituen gure hastapenetan: “zuek erotuta zaudete”, “arrisku handiegia da gaur egungo egoeran”, “gehiegi amesten duzue” eta gisakoak. Baina hemen gaude aizue! Gure bizi-proiektua, txikitasunetik, pausoz-pauso eraikitzen, eta Ekonomia Sozial Eraldatzailean, Olatukoopeko gainontzeko kideekin batera, haziak ereiten eta bidea egiten.

Obra

Baina nondik dator Lakari proiektua? Lakaritarrok, beste hainbatek bezala, argi genuen egungo elikadura- eta nekazaritza-ereduen atzean enpresa handien interes ugari daudela, eta horiek direla azken finean non eta nola jan behar dugun erabakitzen dutenak; hortaz, beraiek zehazten dituzte gure elikagaiak nola ekoitzi, eta nola merkaturatu. Beste modu batean esanda, interes komertzialek bultzaturiko ustiapen/ekoizpen- eta merkaturatze-eredu ez-iraunkorrak ditugu nagusi, beti ere, etekin maximoa lortzeko helburuarekin. Egoera horretan, multinazional gutxi batzuk ateratzen dira irabazten; aldiz, herritar gehienok galtzaileen artean gaude.

Ondorioz, han-hemenka, gero eta pertsona gehiagok interesa du sasoian sasoiko eta bertako produktuak kontsumitzean, ingurugiroa zaintzean, osasuntsu elikatzean, tokiko ekonomia eta lanpostu duinak eta iraunkorrak sortzean, eta sortzen diren hondakinak eta erabiltzen den energia kudeatzeko modu arduratsuetan. Horren isla da eredu alternatiboetan lan egiten duten hainbat eragile eta erakunde, bai nekazaritza ekologikoan, bai kontsumo-kooperatiba agroekologikoetan, bai eskolako jantoki ekologikoetan, bai bidezko merkataritzan…

Ekimen horiek guztiek, gainera, tokiko garapenean eta inguru hurbilenean eragin sozial positiboa sortzea lortu dute. Nola? Bada, nekazari eta ekoizleen ogibidean lagunduz, kontsumitzailearen eta laborariaren arteko merkaturatze-bide berriak eraikiz, bi aldeentzat egokiak diren prezioak adostuz, jaten duguna kalitatezkoa dela bermatuz, bertako elikagaien kontsumoa handitzen duten heinean lanpostuak sortuz, kontsumo arduratsuaren esanahia eta indarra gizarteratuz eta ekimen ezberdinen arteko lankidetza-proiektuak elkarlanean antolatuz.

Jarduerak

Eta lakaritarrok ere norabide horretan pauso bat ematea beharrezkoa zela ikusi genuen. Horregatik, elikadura eta kontsumo jasangarriaren arloan, gure eskualdean erreferentziazko leku bat izateko asmoarekin jaio da Lakari Kooperatiba. Erosketa-esperientzia pertsonalagoa, etikoagoa eta osasuntsuagoa eskaintzeaz gain, heziketa (sukaldaritza ikastaroak, dastaketak, hitzaldiak…), aholkularitza (laborantzan, agroekologian, elikagai-eraldaketan, kontsumo jasangarrian eta elikaduran) eta ekintzailetasun-kolektiborako ekimenak ere martxan jartzea da gure helburua. Ondorioz, ekologia, osasuna, hurbiltasuna, tratu zuzena, abereen ongizatea, parte-hartzea eta eraldaketa soziekonomikoa dira sustatu nahi ditugun balioak.

Orain arteko prozesu honetan, ekimen eta pertsona ugarik hartu duzue parte gure komunitatean, eta eskerrak ematea besterik ez zaigu geratzen. Halere, egungo kontsumo- zein elikadura-ereduari alternatibak eskaintzeko lan handia dago egiteko. Horregatik, gurekin batera, txikitasunetik, alternatibara batzeko gonbita luzatu nahi dizuegu. Lakari baietz esatea baita izan ginenari, garenari eta izango garenari; baietz esatea eraldaketari!

Lakaritarrak+Olatukoop

Posted on

[Zuzenean] Triticatum, antzinako gari – barietateak berreskuratzen

lakari-logo-beltza

Triticatum egitasmotik garia eta bestelako hainbat zerealen antzinako ehunka barietate berreskuratzea lortu dute, ondoren Kataluniako okindegi ekologikoetan erabiltzen ari direnak. Triticatum egitasmoko alor interesgarrienetakoa da zereal ekoizleen, zenbait artisau-okindegiren eta Victor García errotariaren artean burutu duten ikerkuntza partehartzaileko lana.

Partekaturiko lan horri esker, esku artean dituzten barietate ezberdinak hobeto ezagutzeko eta duten gaitasuna baloratzeko aukera izan dute, eta horretaz jardungo da Victor García Gironako errotaria.

Posted on

LAKARI, zure neurrira.

Azken mende erdian gure jendartea nola eta zein abiaduratan garatu da nagusiki? Bide horretatik norantz goaz, eta noiz arte? Geure buruari galdera horiek egin, gogoetan murgildu, eta hemen gatoz beste garapen eredu baterako norabidea hartuta. Lakarik ekonomia sozial eraldatzailea du oinarrizko printzipioetako bat eta elikadura zein osasuna modu iraunkorrago batean jorratuko ditu. Zure neurrira.

Hain zuzen ere, izenak izana ematen duenez, orain dela hamarkada gutxi oso ohikoa zen neurria hartu dugu markatzat: lakaria. Egurrezko tresna karratu hori baserri gehienetan egoten zen eta traturako erabiltzen zen batik bat. Azokan babarrunak saltzeko. Edota baserrira zetorren erostunari alea ondo neurtuta emateko. Beraz, lakariaren funtzionamenduak ematea eta hartzea ditu oinarrian. Lehenbizi, ereinez lurrari emandakoa uzta jasota hartzea; eta, gero, interesa zuenari nahi zuena ematea, hark kalitate goreneko elikagaiak har zitzan. Batzuetan diruz ordainduak, besteetan trukea eginda. Lakarin ere hartu emanak (eta eman-hartuak) landu nahi ditugu. Zure neurrira.

Lakaria bere garaiko umea da, ordea, eta senide ugari du: anega eta anega-erdikoa aleentzat, neurri-otarrak sagarrentzat, imia eta beste hainbat. Imia edo gaitzerua deitzen zaion tresnak eman dio irudia gure markari. Oreka eta proportzioaren bila, hamabi lakari sartzen diren egurrezko neurgailua hautatu dugu logoa marrazteko. Hamabi hilabete eta garaian garaikoa sartu ditugu imi horretan. Osasunak eta elikadurak ez dutelako etenik. Zer jan, hura izan. Eta guk ondokoari lehengai onak erosita jan nahi dugu. Garaikoa eta bertakoa, horixe da egiten dizugun proposamena. Zure neurrira.

Hitz zaharrei zentzu berria emanda, gure iraganarentzat etorkizuna ereiten ari gara. Hizkuntza bera dugunez, arazorik gabe ulertuko dugu elkar. Eta orain, hartu-emanetarako gune berria daukagu: Lakari. Zure neurrira.