Posted on

Bina-bina, eraldatzen eta (agro)saretzen

Gu konturatzerako, 2.urteurrena ospatzeko eguna ere iritsi zaigu! Gora ta gora Lakari eta lakaritarrak! (Harrotasunez eta ez harrokeriaz, :D).

Hasieratik argi izan genuen egitasmo integral bat egikaritu nahi genuela elikadura eta kontsumo jasangarriaren arloan eta elikadura burujabetzaren bidean, agroekologia oinarri hartuta. Hori gutxi ez, eta beste ekonomia eredu batean sortu nahi genuen hori guztia, gure eta tokiko beharrei erantzun bat emateko, eta gure bizi-proiektuak eraikitzeko. Eta Ekonomia Sozial Eraldatzailean, eta, zehazki, Olatukoop sarean topatu genituen osagaiak.

Osagai guztiak eltze batean sartu eta egunez egun, goxo-goxo, zuentzat, gure komunitatearentzat, jaki eraldatzaileak prestatzen dihardugu.

Guretzat, bigarren urte hau berezia izan da, gure bizi-apustua sendotze aldera: denda eta sukaldearen zerbitzuak egonkortu ditugu produktu-eskaintzan hobekuntzak eginda; hainbat eragilerentzat (Zarauzko EHE eta AEK, KoopFabrika, Olatukoop, Kontseilua, UEU, Tabakalera,  Hernaniko Udala…) ekimen eta ospakizunetarako mokaduak prestatu ditugu, mokadu-zerbitzua indartuta; elikadura zein aholkularitzarako zerbitzuak martxan jarri berri ditugu; sukaldaritza-ikastaroekin jarraitu dugu, etab. luze bat.

Dibertsifikazio hori guztia, ezinezkoa izango litzateke saretze kooperatiboari heldu gabe. Eta horixe da hemendik aurrera ere gure konpromisoa: lankidetzan eta elkarlanean, proiektu eta zerbitzu eraldatzaileak eskaintzea gure komunitateari eta herriari! Horregatik, eskerrak ematea ere badagokigu, konfiantza, babesa, ilusioa eta indarra eskaini diguzuen guztioi! Zuei esker eta zuekin batera, zarauztarrok diogun moduan, bina-bina urteak betetzeko asmo irmoa dugu!

Hortaz, izan lakarilaguna eta elkarrekin, etorkizuna lantzen, elikadura eta kontsumo jasangarria lantzen, ESE ereiten, txikitik eraldatzen eta (agro)saretzen jarraituko dugu!

Posted on

SUKALDARITZA BEGANOA

Udazkena eta ikasturte berria hastearekin batera, sukaldaritza-tailerrak abian jarriko ditugu berriz ere gure #LakariLab txokoan. Oraingo honetan, sukaldaritza beganoaren mundura hurbilduko gara. Izan ere, asko izan zarete, bi urte betetzear gauden honetan (urriaren 29an hain justu), sukaldaritza beganoarekiko interesa agertu duzuenak.

Hori dela eta, 4 saiotan banatutako hastapen-tailerra prestatu dugu  Eduard Alonsorekin (Aian bizi den Valentziarra). Berekin batera, eta sarrera moduan, Izaskun Sagartzazu lakaritarrak sukaldaritza beganoan erabiltzen diren elikagaiei buruzko elikadura-oharrak ere emango ditu, ondoren, etxean, otordu osasungarriak prestatzeko oinarri moduan.

Lau tailer horietan, denetarik landuko dugu: haragiaren ordezkoak, pateak, saltsak, kroketa eta hanburgesa/albondiga begetalak, arrautzarik eta esnekirik gabeko gozogintza…

Ikastaroak urria eta azaroan zehar burutuko ditugu, asteazkenetan, 18:00etatik 20:00etara, Lakari Kooperatiban. Saioak gaztelaniaz izango dira eta errezeta-bilduma euskaraz banatuko dugu. Horretaz gain, saio bakoitzean prestatutako mokaduak dastatzeko aukera ere izango duzue.

Elikadura beganoa jarraitzen ez duzuenontzat edota arrautza eta esnekiekiko intolerantziaren bat duzuenontzat ere aukera paregabea izan liteke sukaldaritza-mota honetara hurbiltzea, ideia berriak hartu eta gure eguneroko otorduetan mokadu berriak prestatzeko.

Dagoeneko izen-emate epea zabalik dugu. Horretarako deitu 943 133 694 telefono zenbakira edo idatzi info@lakari.eus helbide elektronikora.

Informazio gehiago (Klikatu hemen)

#sukaldaritzabeganoa #elikaduraosasungarria #ekinezikasi #LakariLab

Posted on

[Sukaldaritza-tailerra] Barazki eta entsalada sortzaileak

Uda iristear dago, eta bagatoz Igone Fanlo Coach|ren sukaldaritza-ikastaro berri batekin.

Oraingo honetan, eta zuetariko batzuek apirilean argitaratu genuen online galdetegiari txukun-txukun emandako erantzunak aintzat hartuta, “Barazki eta entsalada sortzaileak” showcooking-tailerrarekin gatoz oraingo honetan. Sukaldaritza-tailerra arratsaldeko 18:00etan hasiko da gure egoitzan, eta 2 orduko iraupena izango du gutxi gorabehera.

Bertan, Igonek barazkiak edo ortuariak prestatzeko hainbat modu erakutsiko dizkigu: mozketa- eta beratze/mazerazio-teknikak, konbinazio goxoak, ongailu eta gatzozpintzerako hainbat aukera…

Hortaz, ikastaroaren ostean, denbora eta ideia gabezia ez dira aitzakia izango sukaldean aritzeko.

#sukaldaritzajasangarria #elikaduraosasungarria #LakariLab #hezkuntzatxokoa #ekinezikasi

Eman izena!

Izen-ematea

  • Price: 22,00 € Quantity:

Posted on

Igone Fanloren sukaldaritza-tailerrak: galdetegia

Gure sare sozialetan jarraitzen bagaituzue, ikusiko zenuten sukaldaritza-tailerrak antolatzen jarraitzen dugula lakaritarrok. Martxoaren 25ean, hain justu, Igone Fanlo Coach|rekin “Garbiketarako Udaberriko Sukaldaritza” tailer arrakastatsua izan genuen. 18 lagun bildu ginen bertan, eta, besteak beste, ondorengo plater goxo eta osasungarriak prestatzeko eta dastatzeko aukera izan genuen:

IMG-20170325-WA0013

  • Miso Zopa
  • Dilista gorri zopa azkarra
  • Kale aza eta garagar-entsalada garbantzu “croutons”ekin
  • Oshawa ogia
  • Orburuak eta borrajak almendrekin
  • Sagar eta udare konpota pomelo eta iltze aromarekin
  • Garbiketarako zuku berdea

Izandako harrera ona ikusirik, datozen hilabeteetarako eskaintza zabaldu nahi dugu. Horretarako, ordea, zuen iritzia jakin nahiko genuke. Eskertuko dizuegu, beraz, beheko galdetegia betetzea.

Eskerrik asko!

#sukaldaritzajasangarria #elikaduraosasungarria #LakariLab #hezkuntzatxokoa #ekinezikasi

Igone Fanloren sukaldaritza-tailerrak

  • Nahi beste ikastaro markatu ditzakezu.
  • This field is for validation purposes and should be left unchanged.

 

Posted on

Egin tokia elikadura eta kontsumo jasangarriari Eguberrietan

Gabonak iristear ditugun honetan, bagara familian, lagunartean… mahai baten inguruan biltzen jarraitzen dugunak. Jatordu horietan, tokiko ekoizpenetik zein ekoizpen jasangarria sustatzen duten ekoizleengandik eratorritako elikagaiekin gure sukaldeak, ezkaratzak zein gastronomia-txokoak betetzeko hautua egiteko gonbita luzatu nahi dizuegu. Eta bide horretan, hainbat eskaintza prestatu ditugu zuentzat.

Lehenik, eta iaz hasitakoari jarraipena emanez, saski goxo bezain “eraldatzaileak” prestatu ditugu. Aurten, gainera, gure online dendatik erostea erabakitzen baduzue, etxean jasotzeko parada ere izango duzue (abenduaren 15etik hasita). Otzara horietan, denetariko produktuak aurki ditzakezue (bertakoak, agroekologikoak eta bidezko merkataritzakoak), eta merkaturatze-bide laburren filosofia oinarri hartuta, zuzenean ekoizleengandik (bestelako bitartekaririk gabe) jasotakoak dira, gainera. Geografia aintzat hartuta, eremu hurbilenetik -Gipuzkoatik- hasita, Arizia, Sakona-Komuntzo etxalde ekologikoa, Maisor, Ezkurtxerri, Ondare, Basatxerri, Agerreburu, Urruzola, Alkartasuna Kooperatiba, Eguzki-Leire, Mala Gissona eta Zarautz Beer Companyko produktuak daude. Nafarroatik, berriz, Josenea, La Casa del Aceite, El Alcaravan, Conservas Maria Jesus eta Conservas Iturri etxeak hautatu ditugu. Azken lauak, gainera, Errigora egitasmoko ekoizleak ere badirela gogoratzea ez dago soberan. Arabako ardo ekologikoa ere presente dago “Herrigoia” ardo beltz ekologikoa medio. Eta Bizkaiatik Olatukoop sareko gure kide den Boga kooperatibako garagardoek ere bere tokitxoa dute noski! Euskal Herritik kanpo Katalunia, Aragoi, Galizia, Burgos eta Gaztela-Mantxako ekoizleak daude presente.

Eta, beste berrikuntza bat ere badute aurtengoan saskiek: kalitatezko elikagaiekin mokadu goxoa prestatzeko errezeta bat edo bi gehitu ditugu. Makina bat osagai, beraz, tokiko garapenari, osasunari eta jasangarritasunari baietz esateko.

Bestetik, sukaldean aritzeko gogorik edo denborarik ez baduzue, gure sukaldean mimo handiz prestatutako platerak ere ez dira faltako. Gure urtebeteko ibilbidean gure mokaduez gozatu ahal izan duzuenok, badakizue zertaz ari garen. Kroketak, piper beteak, krepak eta pate begetalak, horiek gure proposamenak! Hori bai, eskaerak aldez aurretik egitea beharrezkoa izango da; zehazki, abenduaren 24erako eta 25erako eskariak egiteko azken eguna, abenduak 19, astelehena, izango da. Abenduaren 31erako eta urtarrilaren 1erako, abenduak 26, astelehena. Eta urtarrilaren 5erako, berriz, abenduak 31, larunbata.

gabonetarako-platerak-2016

Postrerako eskaintza ere ez dugu ahaztu nahi izan, eta, aurten Eguzki-Leirek prestatutako turroiak (txokolatezkoa, esnegain eta intxaurrezkoa, arrautz gorringozkoa, gogorra, biguna eta frutazkoa) eta espeltazko polboroiak aurkituko dituzue gure dendan. Zergatik? Bada apustu sendoa egiten dutelako ekoizten dituzten elikagaietan erabilitako lehengai guztiak ekologikoak izan daitezen, eta ahalik eta bertakoenak, hots, Euskal Herrikoak.

Honenbestez, egin tokia elikadura eta kontsumo jasangarriari, eta, segi gurekin batera, #txikitikeraldatzen! #onegin!
Posted on

Batu festara gure I.urteurrenean

Datorren astean gure lehenengo urteurrena izango dugu! Ametsak betetzen joateko eta jendarte mundiala ezagutzeko parada izan dugu bitarte honetan, eta aurrera jarraitzeko ospakizun on bat bezalakorik ez dago. Horregatik, eta lakaritarron komunitatea sendotzen joateko, hainbat ekimen antolatu ditugu:

1. Urriak 22, larunbata. Igone Fanlok “Inprobisazioa eguneroko sukaldean” ikastaroa eman behar zuen, baina pena handiz bertan behera geratu da. Dena den, aurrerago egingo dugu beste saioren bat.

2. Urriak 26, asteazkena, 18:30. Amaia Diaz de Monasterioguren nutrizionistaren eskutik hitzaldi-tertulia izango dugu “Eskola Jantokia eta Elikadura Osasungarria” izenekoa. Gaur egun, asko dira eskola-jantokietan bazkaltzen duten haurrak, baina oraindik orain, ez dakigu gainerako otorduetan oreka nola topatu. Amaiak hitzaldi honetan, etxeko elikadura egoki baterako argibideak eskainiko dizkigu adibide praktikoekin. Zuen zalantzak bota eta tertulia eder batez gozatzeko aukera ederra izango da.

urriak-26-amaia

3. Urriak 28, ostirala, 19:30. Nordesia bermut galiziarraren dastaketa antolatu dugu Goñi ardotekako Amaya Goñirekin. 3 barietate probatzeko aukera egongo da (beltza, gorria edo zuria) mokadutxo batekin batera 2€ren truke. Larunbaterako aurre-beroketa paregabea!

bermut-dastaketa

Egitarau ofizialetik kanpo, gure bezero fidelentzat tailertxo berezi bat ere antolatu dugu ostiralean 18:00etan. Bertan, Maisorrek antxoak kontserbarako modu tradizionalean prestatzen erakutsiko digu. Pribilegio izugarria!

4. Urriak 29, larunbata, 12:00-14:00. Egun handia. Gonbidapen berezia luzatu nahi dizuegu Lakari Kooperatiba proiektua gertutik jarraitu eta bizi duzuen guztioi. Horretarako haurrentzat (eta helduentzat) mural margoketa, gure mokadutxoak, Zarautz Beer Companyko garagardoa eta Occhi di Farfallaren kontzertutxoa izango ditugu. Guretzat plazer handia izango da #sorginenbrindisa zuekin partekatzea. 

urriak-29-urteurrena

occhi-di-farfalla

#txikitikeraldatzen #etorkizunalantzen #elikaduraetakontsumojasangarrialantzen #ESEereiten jarraituko dugu zu(r)ekin #zureneurrira #zuenneurrira

Batu festara!

Posted on

[Ikastaroa] Inprobisazioa eguneroko sukaldean

Urriaren 22an, larunbata, Igone Fanloren eskutik sukaldaritza ikastaroa antolatu dugu Lakariko gure sukaldetxoan. Bertan, egunerokotasunean etxean ditugun osagaiekin, plater goxo bezain osasungarriak prestatzen ikasteko aukera izango dugu. 3-4 ordu inguruko iraupena izango du ikastaroak, eta prestatutako jakiak dastatzeko aukera ere izango da.

Inbrobisazioa erabilita, beste hainbat errezeta garatzeko ideiak eta aholkuak ere emango dira.

Hortaz, ez galdu aukera eder hau eta eman izena!

 

Posted on

Uztailean Lakarin haur-tailerrak

Udan sartzera goazen honetan, haur asko oporretan izango dira. Lakarin, halere, egongo da zer egina, 8-10 urte bitarteko haurrentzat elikadura, ekoizpen eta kontsumo jasangarriaren inguruan, 3 orduko iraupena izango duten 4 tailer antolatu baititugu, uztaileko 4 asteartetan, hain justu. Hasiera, beraz, uztailaren 5ean emango diogu Martxel Aizpurua erle-adituarekin. Bertan, erleak, polinizazioa, erle-produktuak eta horien aplikazioa sukaldean arloak landuko dira, besteak beste. Bigarren saioan, uztailaren 12an, berriz, Miren Prieto lakaritarrarekin baratze txiki baten sorrera ardatz hartuta tailer praktikoa egongo da; haziak ereiten, landareak zaintzen ikasi eta jolas didaktikoen bitartez landare aromatikoen mundua ezagutzeko aukera izango da. Uztailaren 19an Larreta Esnekiak-eko Leire Lizeaga izango dugu gurekin, eta esnekien mundura gerturatzeko aukera bikaina eskainiko digu era praktiko eta dibertigarrian. Bukatzeko, Leire Epelde lakaritarrarekin otordu osasuntsuen prestaketarako sukaldaritza-tailerra izango da, uztailaren 26an.

Adin-tartea zehaztu dugun arren, gazteago edo zaharragoak diren haurrek interesa balute, ez izan zalantzarik eta eman izena.

Haurrak baserritarren ekoizpenarekin, elikadura eta sukaldaritza osasuntsuarekin eta ingurumen jasangarriarekin harremanetan jartzeko aukera ederra delakoan gaudenez, animatuuu!

 

 

Posted on

Posible al da ekonomia-eredu iraunkorra?

Bihar, ekainak 16, osteguna, mahai-inguru interesgarria antolatu dugu Lakariko #LakariLab txokoan (goiko solairuan) 19:00etan.

Gaur egun bizi dugun krisi sistemikoaren gako batzuk ulertu eta horren aurrean, antolatzeko eredu sozial eta ekonomikoa berria, Ekonomia Sozial Eraldatzailea, zer den azalduko da. Alternatiba sozioekonomiko horrek, jendartearen ongizatea eta bizitzaren iraunkortasuna helburu izango dituen garapen-eredu egonkor eta parekidea ahalbidetzea du helburu, eta, hortaz, tokiko garapen jasangarrian eragin zuzena du.

Egungo egoera ekonomikoaren gorabeherak azaltzen Ibai Gesalaga zarauztarra izango dugu, eta ESEren nondik norakoak argitzen, berriz, Olatukoop sareko eta Talaios kooperatibako kide diren Gorka Julio eta Beñat Irasuegi.

Lakaritarrok Olatukoop sareko kide ere bagarenez, deialdi berezia egin nahi dizuegu errealitate sozioekonomiko berrien eraikitze-prozesuan zabiltzaten edo interesa duzuen guztioi bertaratzeko. Animatu!!!

Posted on

Lakari, baietz esatea da eraldaketari!

Dagoeneko 2 urte inguru igaro dira, Zarauzko Azken Portu auzoan, gure kooperatibari Lakari izena jartzea erabaki genuen maiatzeko egun hartatik. Eta a zer nolako abentura orain arteko ibilbidea; nork esango zigun guri, gure etxeetako bulego inprobisatuetan, amesten genuen proiektua honaino iritsiko zenik. Izan ere,  makina bat komentario entzun behar izan genituen gure hastapenetan: “zuek erotuta zaudete”, “arrisku handiegia da gaur egungo egoeran”, “gehiegi amesten duzue” eta gisakoak. Baina hemen gaude aizue! Gure bizi-proiektua, txikitasunetik, pausoz-pauso eraikitzen, eta Ekonomia Sozial Eraldatzailean, Olatukoopeko gainontzeko kideekin batera, haziak ereiten eta bidea egiten.

Obra

Baina nondik dator Lakari proiektua? Lakaritarrok, beste hainbatek bezala, argi genuen egungo elikadura- eta nekazaritza-ereduen atzean enpresa handien interes ugari daudela, eta horiek direla azken finean non eta nola jan behar dugun erabakitzen dutenak; hortaz, beraiek zehazten dituzte gure elikagaiak nola ekoitzi, eta nola merkaturatu. Beste modu batean esanda, interes komertzialek bultzaturiko ustiapen/ekoizpen- eta merkaturatze-eredu ez-iraunkorrak ditugu nagusi, beti ere, etekin maximoa lortzeko helburuarekin. Egoera horretan, multinazional gutxi batzuk ateratzen dira irabazten; aldiz, herritar gehienok galtzaileen artean gaude.

Ondorioz, han-hemenka, gero eta pertsona gehiagok interesa du sasoian sasoiko eta bertako produktuak kontsumitzean, ingurugiroa zaintzean, osasuntsu elikatzean, tokiko ekonomia eta lanpostu duinak eta iraunkorrak sortzean, eta sortzen diren hondakinak eta erabiltzen den energia kudeatzeko modu arduratsuetan. Horren isla da eredu alternatiboetan lan egiten duten hainbat eragile eta erakunde, bai nekazaritza ekologikoan, bai kontsumo-kooperatiba agroekologikoetan, bai eskolako jantoki ekologikoetan, bai bidezko merkataritzan…

Ekimen horiek guztiek, gainera, tokiko garapenean eta inguru hurbilenean eragin sozial positiboa sortzea lortu dute. Nola? Bada, nekazari eta ekoizleen ogibidean lagunduz, kontsumitzailearen eta laborariaren arteko merkaturatze-bide berriak eraikiz, bi aldeentzat egokiak diren prezioak adostuz, jaten duguna kalitatezkoa dela bermatuz, bertako elikagaien kontsumoa handitzen duten heinean lanpostuak sortuz, kontsumo arduratsuaren esanahia eta indarra gizarteratuz eta ekimen ezberdinen arteko lankidetza-proiektuak elkarlanean antolatuz.

Jarduerak

Eta lakaritarrok ere norabide horretan pauso bat ematea beharrezkoa zela ikusi genuen. Horregatik, elikadura eta kontsumo jasangarriaren arloan, gure eskualdean erreferentziazko leku bat izateko asmoarekin jaio da Lakari Kooperatiba. Erosketa-esperientzia pertsonalagoa, etikoagoa eta osasuntsuagoa eskaintzeaz gain, heziketa (sukaldaritza ikastaroak, dastaketak, hitzaldiak…), aholkularitza (laborantzan, agroekologian, elikagai-eraldaketan, kontsumo jasangarrian eta elikaduran) eta ekintzailetasun-kolektiborako ekimenak ere martxan jartzea da gure helburua. Ondorioz, ekologia, osasuna, hurbiltasuna, tratu zuzena, abereen ongizatea, parte-hartzea eta eraldaketa soziekonomikoa dira sustatu nahi ditugun balioak.

Orain arteko prozesu honetan, ekimen eta pertsona ugarik hartu duzue parte gure komunitatean, eta eskerrak ematea besterik ez zaigu geratzen. Halere, egungo kontsumo- zein elikadura-ereduari alternatibak eskaintzeko lan handia dago egiteko. Horregatik, gurekin batera, txikitasunetik, alternatibara batzeko gonbita luzatu nahi dizuegu. Lakari baietz esatea baita izan ginenari, garenari eta izango garenari; baietz esatea eraldaketari!

Lakaritarrak+Olatukoop